تضمين بر شعر انيسي شاملو

ہميشہ صورت باد سحر آوارہ رہتا ہوں

محبت ميں ہے منزل سے بھي خوشتر جادہ پيمائي

دل بے تاب جا پہنچا ديار پير سنجر ميں

ميسر ہے جہاں درمان درد نا شکيبائي

ابھي نا آشنائے لب تھا حرف آرزو ميرا

زباں ہونے کو تھي منت پذير تاب گويائي

يہ مرقد سے صدا آئي ، حرم کے رہنے والوں کو

!شکايت تجھ سے ہے اے تارک آئين آبائي

ترا اے قيس کيونکر ہوگيا سوز دروں ٹھنڈا

کہ ليلي ميں تو ہيں اب تک وہي انداز ليلائي

نہ تخم 'لا الہ' تيري زمين شور سے پھوٹا

زمانے بھر ميں رسوا ہے تري فطرت کي نازائي

تجھے معلوم ہے غافل کہ تيري زندگي کيا ہے

کنشتي ساز، معمور نوا ہائے کليسائي

ہوئي ہے تربيت آغوش بيت اللہ ميں تيري

دل شوريدہ ہے ليکن صنم خانے کا سودائي

وفا آموختي از ما، بکار ديگراں کر دي ''

''ربودي گوہرے از ما نثار ديگراں کر دي