خوش وحشتے کہ عرض جنون فنا کروں

جوں گرد راہ جامۂ ہستی قبا کروں

آ اے بہار ناز کہ تیرے خرام سے

دستار گرد شاخ گل نقش پا کروں

خوش افتادگی کہ بہ صحراۓ انتظار

جوں جادہ گرد رہ سے نگہ سرمہ سا کروں

صبر اور یہ ادا کہ دل آوے اسیر چاک

درد اور یہ کمیں کہ رہ نالہ وا کروں

وہ بے دماغ منت اقبال ہوں کہ میں

وحشت بہ داغ سایۂ بال ہما کروں

وہ التماس لذت بے داد ہوں کہ میں

تیغ ستم کو پشت خم التجا کروں

وہ راز نالہ ہوں کہ بہ شرح نگاۂ عجز

افشاں غبار سرمہ سے فرد صدا کروں