haqueeqat-aashnaai asl mein gum-karda raahi hai

uroos-e-aaghi parwurda-e-ibhaam hai saaqui

mubaarak ho zaeefi ko khirad ki falasfa-raani

jawaani be-niyaaz-e-ibrat-e-anjaam hai saaqui

hawas hogi aseer-e-halqua-e-nek-o-bad-e-aalam

mohabbat maawra-e-fikr-e-nang-o-naam hai saaqui

abhi tak raaste ke pech-o-kham se dil dhadakta hai

mira zauque-e-talab shaayad abhi tak khaam hai saaqui

wahan bheja gaya hoon chaak karne parda-e-shab ko

jahan har subh ke daaman pe aks-e-shaam hai saaqui

mire saaghar mein mai hai aur tire haathon mein barbat hai

watan ki sar-zamin mein bhook se kohraam hai saaqui

zamaana barsar-e-paikaar hai pur-haul sholon se

tire lab par abhi tak naghma-e-khayyaam hai saaqui