angadaaiyon mein phailte hain baar baar haath

sheesha ki samt badhte hain be-ikhtiyaar haath

doobe hain tark-e-sai se afsos toh ye hai

saahil tha haath bhar pe lagaate jo chaar haath

aati hai jab naseem toh kahti hai mauj-e-bahar

yoon aabroo samet agar hon hazaar haath

darpay hain mere quatl ke ahbaab aur main

khush hoon ki mere khoon mein rangate hain yaar haath

daaman-kashan chali hai badan se nikal ke rooh

khinchate hain phailte hain jo yoon baar baar haath

mitta nahi nawishta-e-quismat kisi tarah

patthar se sar ko phod ki zaanoo pe maar haath

saaqui sambhaalna ki hai labrez jaam-e-mai

laghzish hai mere paanw mein aur raasha-daar haath

mutrib se poochh masaala-e-jabr-o-ikhtiyaar

kya taal sam pe uthte hain be-ikhtiyaar haath

main aur hoon alaaek-e-duniyaa ke daam mein

mera na ek haath na us ke hazaar haath

ai nazm wasl mein bhi raha tu na chain se

dil ko hua quaraar toh hai be-quaraar haath