mujhe jazb-e-dil ne ai juz bahak ke rakha quadam koi

mujhe par lagaae shauque ne kahin thak ke main jo thahar gaya

mujhe peeri aur shabaab mein jo hai imtiyaaz toh is quadar

koi jhonka baad-e-sahar ka tha mire paas se jo guzar gaya

asar us ke ishwa-e-naaz ka jo hua wo kis se bayan karoon

mujhe toh ajal ki hai aarzoo use waham hai ki ye mar gaya

tujhe ai khateeb-e-chaman nahi khabar apne khutba-e-shauque mein

ki kitaab-e-gul ka waraque waraque tiri be-khudi se bikhar gaya

kise tu sunaata hai ham-nashin ki hai ishwa-e-dushman-e-aql-o-din

tire kahne ka hai mujhe yaquin main tire daraane se dar gaya

karoon zikr kya main shabaab ka sune kaun quissa ye khawaab ka

ye wo raat thi ki guzar gai ye wo nashsha tha ki utar gaya

dil-e-naa-tawan ko takaan ho mujhe us ki taab na thi zara

gham-e-intizaar se bach gaya tha nawed-e-wasl se mar gaya

mire sabr-o-taab ke saamne na hujoom-e-khauf-o-raja raha

wo chamak ke barque rah gai wo garaj ke abr guzar gaya

mujhe bahar-e-gham se uboor ki nahi fikr ai mire chaara-gar

nahi koi chaara-kaar ab mire sar se aab guzar gaya

mujhe raaz-e-ishq ke zabt mein jo mazaa mila hai na poochhiye

mai-e-angabin ka ye ghoont tha ki gale se mere utar gaya

nahi ab jahaan mein dosti kabhi raaste mein jo mil gae

nahi matlab ek ko ek se ye idhar chala wo udhar gaya

agar aa ke ghussa nahi raha toh lagi thi aag ki bujh gai

jo hasad ka josh faro hua toh ye zahar chadh ke utar gaya

tujhe nazm waadi-e-shauque mein abas ehtiyaat hai is quadar

kahin girte girte sambhal gaya kahin chalte chalte thahar gaya