bahaar-e-mai-kashi aai chaman ki rut badalti hai

ghata mastaana uthti hai hawa mastaana chalti hai

z-khud-rafta tabeeat kab sambhaale se sambhalti hai

na ban aati hai naaseh se na kuchh waaiz ki chalti hai

ye kis ki hai tamannaa chutkiyan leti hai jo dil mein

ye kis ki aarzoo hai jo kaleje ko masalti hai

wo deewaana hai jo is fasl mein fasdein na khulwaae

rag-e-har-shaakh-e-gul se khoon ki naddi ubalti hai

sahar hote hi dam nikla ghash aate hi ajal aai

kahan hoon main naseem-e-subh pankha kis ko jhalti hai

tamatto ek ka hai ek ke nuqusan se aalam mein

ki saaya phailta jaata hai joon joon dhoop dhalti hai

bina rakkhi hai gham par zeest ki ye ho gaya saabit

na lapka aah ka chhootega jab tak saans chalti hai

quaraar ik dam nahi aata hai khoon-e-be-gunah pi kar

ki ab toh khud b-khud talwaar rah rah kar ugalti hai

jahannam ki na aanch aaegi mai-khwaaron pe o waaiz

sharaab aalooda ho jo shay wo kab aatish mein jalti hai

na dikhlaana ilaahi ek aafat hai shab-e-furqat

na jo kaate se katti hai na jo taale se talti hai

ye achchha shughl wahshat mein nikaala tu ne ai haidar

gareban mein ulajhne se tabeeat toh bahalti hai