sunte ho ahal-e-quafila main koi raahbar nahi

dekh raha hoon tum mein se ek bhi raah par nahi

maut ka ghar hai aasman is se kahin mafar nahi

niklein toh koi dar nahi bhaagein toh rahguzar nahi

pahle jigar par aah ka naam na tha nishan na tha

aakhir-e-kaar ye hua aah toh hai jigar nahi

subh-e-azal se ta-abad quissa na hoga ye tamaam

jaur-e-falak ki daastan aisi bhi mukhtasar nahi

barg-e-khizan-raseeda hoon chhed na mujh ko ai naseem

zauque fughan ka hai mujhe shikwa-e-abr-e-tar nahi

munkir-e-hashr hai kidhar dekhe tu aankh khol kar

hashr ki jo khabar na de aisi koi sahar nahi

shabnam o gul ko dekh kar wajd na aae kis tarah

khanda be-sabab nahi girya be-asar nahi

tere faqueer ka ghuroor taajawron se hai siwa

tarf-e-kulah mein de shikan us ko ye dard-e-sar nahi

koshak o quasr o baam-o-dar tu ne bina kiye toh kya

haif hai khaanuman-kharaab dil mein kisi ke gher nahi

naala-kashi raqueeb se meri tarah muhaal hai

dil nahi hausla nahi zohra nahi jigar nahi

shaatir-e-peer-e-aasman waah-ri teri dastaburd

khusraw o kaiquibaad ki tegh nahi kamar nahi

shaan kareem ki ye hai han se ho peshtar ata

lutf ata ka kya ho jab han se ho peshtar nahi

laakh wo be-rukhi kare laakh wo kaj-rawi kare

kuchh toh malaal is ka ho dil ko mire magar nahi

sun ke bura na maaniye sach ko na jhoot jaaniye

zikr hai kuchh gila nahi baat hai neshtar nahi