banaaya tod ke aaeena aaeena-khana

na dekhi raah jo khalwat se anjuman ki taraf

rah-e-wafa ko na chhoda wo andaleeb hoon main

chhuta quafas se toh parwaaz ki chaman ki taraf

gurez chahiye tool-e-amal se saalik ko

suna hai raah ye jaati hai raahzan ki taraf

sara-e-dahar mein sooge ghaafilo kab tak

utho toh kya tumhein jaana nahi watan ki taraf

jo ahal-e-dil hain alag hain wo ahal-e-zaahir se

na main hoon shaikh ki jaanib na barahman ki taraf

jahaan-e-haadsa-aageen mein bashar ka warood

guzar habaab ka dariya-e-maujzan ki taraf

isi umeed pe ham din khizan ke kaatte hain

kabhi toh baad-e-bahaar aaegi chaman ki taraf

bichhad ke tujh se mujhe hai umeed milne ki

suna hai rooh ko aana hai phir badan ki taraf

gawaah kaun mire quatl ka ho mahshar mein

abhi se saara zamaana hai tegh-zan ki taraf

khabar di uth ke quayaamat ne us ke aane ki

khuda hi khair kare rukh hai anjuman ki taraf

wo apne rukh ki sabaahat ko aap dekhte hain

jhuke hue gul-e-nargis hain yaasman ki taraf

tamaam bazm hai kya mahaw us ki baaton mein

nazar dahan ki taraf kaan hai sukhan ki taraf

aseer ho gaya dil gesuon mein khoob hua

chala tha doob ke marne chah-e-zaqan ki taraf

ye mai-kashon ki ada abr-e-tar bhi seekh gae

kinaar-e-joo se jo uththe chale chaman ki taraf

zahe-naseeb jo ho karbala ki maut ai nazm

ki ud ke khaak-e-shifa aae khud kafan ki taraf