dikhaae ja rawaani tausan-e-umr-e-rawan mujh ko

hilaal-e-barque se rakh ham-rikaab-o-ham-inan mujh ko

banaaya naa-tawaani ne sulaimaan-e-zaman mujh ko

uda kar le chale mauj-e-naseem-e-bostan mujh ko

dam-e-subh-e-azal se main nawa-sanjon mein hoon tere

bataaya bulbul-e-sidra ne andaaz-e-fughan mujh ko

miri baaton mein kya maaloom kab soe wo kab jaage

sire se is liye kahni padi phir daastan mujh ko

baha kar quafila se door jism-e-zaar ko phenka

ki mauj-e-sail thi baang-e-dara-e-kaarwan mujh ko

ye dil ki be-quaraari khaak ho kar bhi na jaaegi

sunaati hai lab-e-saahil se ye reg-e-rawan mujh ko

udaai khaak jis sahra mein tere waaste main ne

thaka-maanda mila in manzilon mein aasman mujh ko

tasawwur shama ka jis ko jila de hoon wo parwaana

lag utthi aag dil mein jab nazar aaya dhuan mujh ko

wo jis aalam mein ja pahuncha wahan main kis tarah jaaoon

hua dil aap se baahar pinha kar bediyan mujh ko

ghubaar-e-raah se ai nazm ye aawaaz aati hai

gai ai umr-e-rafta tu kidhar phenka kahan mujh ko