khoon-e-hasrat kah raha hai daastaan-e-lakhnaoo

rah gaya hai ab yahi rangin-bayaan-e-lakhnaoo

gosh-e-ibrat se sune koi miri fariyaad hai

bulbul-e-khoonin nawa-e-bostaan-e-lakhnaoo

mere har aansoo mein ik aaeena-e-tasweer hai

mere har naale mein hai tarz-e-fughaan-e-lakhnaoo

dhoondhata hai ab kise le kar charaagh-e-aaftaab

kyoon mitaaya ai falak tu ne nishaan-e-lakhnaoo

lakhnaoo jin se ibaarat thi hue wo naapdeed

hai nishaan-e-lakhnaoo baaqui na shaan-e-lakhnaoo

ab nazar aata nahi wo majma-e-ahal-e-kamaal

kha gae un ko zameen-o-aasmaan-e-lakhnaoo

pahle tha ahal-e-zaban ka daur ab gardish mein hain

chahiye thi tegh-e-urdoo ko fasaan-e-lakhnaoo

marsiya-go kitne yakta-e-zamaana the yahan

koi toh itnon mein hota nauha-khwaan-e-lakhnaoo

ye ghubaar-e-naa-taawan khaakistar-e-parwaana hai

khaandaan apna tha sham-e-doodmaan-e-lakhnaoo

chalta tha jab ghutniyon apne yahan tifl-e-razeea

sajda karte the use gardan-kushaan-e-lakhnaoo

ahad-e-peeraana-sari mein kyoon na sheerin ho sukhan

bachapne mein main ne choosi hai zabaan-e-lakhnaoo

gulshan-e-firdaus par kya naaz hai rizwan tujhe

poochh us ke dil se jo hai rutba-daan-e-lakhnaoo

boo-e-uns aati hai haidar khaak-e-matiya-burj se

jama hain ik ja watan-aawaargaan-e-lakhnaoo