the mahaw laala-o-gul kis kaif-e-be-khudi mein

zakhm-e-jigar ke taanke toote hansi hansi mein

yaaraan-e-bazm-e-ishrat dhoondoon kahan main tum ko

taaron ki chhaanw mein yaa pichhle ki chaandani mein

har uqda mein jahan ke posheeda hai kashaakash

hai mauj-e-khanda-e-gul pinhan kali kali mein

zakhmon mein khud chamak hai aur us pe ye sitam hai

rang-e-pareeda se main rahta hoon chaandani mein

ham kis shumaar mein the pursish jo ham se hoti

ye imtiyaaz paaya aashob-e-aaghi mein

hukm-e-quaza ho jaisa sarzad ho feal waisa

bandaa ka dakhl bhi hai phir is kahi badi mein

raftaar-e-saaya ko hai past-o-buland yaksan

thokar kabhi na khaae raah-e-farotni mein

wajd aa gaya falak ko ghash aa gaya zamin ko

do tarah ke asar the ik saut-e-saramdi mein

taabeer us ki shaayad ek waapsin nafas ho

jo khawaab dekhte the ham saari zindagi mein

laai hubaab tak ko sail-e-fanaa baha kar

ik aah kheenchane ko ik dam ki zindagi mein

mahshar ki aafton ka dhadka nahi raha ab

sau hashr main ne dekhe do din ki zindagi mein

pahloo mein tu ho ai dil phir hasartein hazaaron

kis baat ki kami hai teri salaamti mein

pursaan-e-haal wo ho aur saamne bula kar

kya jaaniye zaban se kya nikle be-khudi mein

tu ek zill-e-hasti phir kaisi khud-parasti

saaya ki parawrish hai daamaan-e-be-khudi mein

haael bas ik nafas hai mahshar mein aur ham mein

parda habaab ka hai farda mein aur di mein

aankhein dikha rahi hai din se mujhe shab-e-gham

aasaar teergi ke hain din ki raushani mein

tu ne toh apne dar se mujh ko utha diya hai

parchhaain phir rahi hai meri usi gali mein

sajda ka hukm mujh ko tu ne toh ab diya hai

pahle hi likh chuka hoon main khatt-e-bandagi mein

ai nazm chhed kar ham tujh ko hue pasheman

kya jaante the zaalim ro dega dil-lagi mein