kuchh aage badh chale saamaan-e-raahat la-makan ho kar

falak peechhe raha jaata hai gard-e-kaarwan ho kar

kisi din toh chale ai aasman baad-e-muraad aisi

ki utrein kashti-e-mai par ghataaein baadban ho kar

na jaane kis bayaaban marg ne mitti nahi paai

bagoole ja rahe hain kaarwan-dar-kaarwan ho kar

wafoor-e-zabt se betaabi-e-dil badh nahi sakti

gale tak aa ke rah jaate hain naale hichkiyan ho kar

guloo-geer ab toh aisa inqalaab-e-rang-e-aalam hai

ki naghme nikle minquar-e-anaadil se fughan ho kar

jo ho kar abr se maayoos khud seenche kabhi dahquan

jala dein khet ko paani ki lahrein bijliyan ho kar

jahan mein waashud-e-khaatir ke saaman ho gae laashe

jagah raahat ki naa-mumkin hui hai la-makan ho kar

hanse koi na bijli ke siwa is daar-e-maatam mein

agar rah jaae saara khet kisht-e-zaafran ho kar

alam mein aashiyan ke is quadar tinke chune main ne

ki aakhir baais-e-taskin hue hain aashiyan ho kar

ghataaein ghir ke kya kya hasrat-e-farhaad par roin

chaman tak aa gain nahrein pahaadon se rawan ho kar

dil-e-shaida ne paaya ishq mein meraaj ka rutba

yahan aksar buton ke zulm toote aasman ho kar

jo darte darte dil se ek harf-e-shauque nikla tha

wo us ke saamne aaya zaban par daastan ho kar

nikal aae hain har iquraar mein inkaar ke pahloo

bana deti hain hairan teri baatein makr yan ho kar

nazaakat ka ye aalam phool bhi tode toh bal kha kar

na jaane dil mira kis tarah toda pahalwan ho kar

tadarrau-o-kabak par hans kar uththe khud ladakhdaate hain

subuk karte hain un ko paaenche baar-e-giran ho kar

gala ghonta hai zabt-e-gham ne kuchh aisa ki mushkil hai

ki nikle munh se aawaaz-e-shikast-e-dil fughan ho kar

pata andesha-e-saalik ne paaya manzil-e-dil ka

tu palta la-makan se aasman-dar-aasman ho kar

hui phir dekhiye aa bustan-e-shaadi-o-gham duniyaa

abhi paida hue the ranj-o-raahat toh aman ho kar

jo nikli hogi koi aarzoo toh ye bhi niklega

tumhaara teer-e-hasrat ban gaya dil mein nihan ho kar

utar jaaega tu o aaftaab-e-husn kothe se

girega saaya-e-deewar ham par aasman ho kar