ye dil ke paar ho kar phir dil ko dhoondate hain

teer-e-nigaah us ke bismil ko dhoondate hain

ik lahar mein na the ham kyoon ai habaab dekha

yoon aankh band kar ke saahil ko dhoondate hain

tarz-e-karam ki shaahid hain mewa-daar shaakhein

is tarah sar jhuka kar saail ko dhoondate hain

hai wasl o hijr apna ai quais turfa-mazmoon

mahmil mein baithe hain aur mahmil ko dhoondate hain

tool-e-amal ka rasta mumkin nahi ki tay ho

manzil pe bhi pahunch kar manzil ko dhoondate hain

hasrat shabaab ki hai ayyaam-e-sheb mein bhi

maadoom ki hawas hai zaail ko dhoondate hain

uthte hain walawle kuchh har baar dard ban kar

kya jaaniye jigar ko yaa dil ko dhoondate hain

zakhm-e-jigar ka mere hai rashk doston ko

marta hoon main ki ye kyoon quatil ko dhoondate hain

ahal-e-hawas ki kashti yak baam o do hawa hai

dariya-e-ishq mein bhi saahil ko dhoondate hain

aaya jo raham mujh par is mein bhi chaal hai kuchh

seene pe haath rakh kar ab dil ko dhoondate hain

karte hain kaar-e-farhaad aasan zameen mein bhi

mushkil-pasand hain ham mushkil ko dhoondate hain

ai khizr pay-e-khajista bahar-e-khuda karam kar

bhatke hue musafir manzil ko dhoondate hain

dil-khwaah tere ishwe dil-joo tire ishaare

wo dil tatolte hain ye dil ko dhoondate hain

ai nazm kya bataaein hajj-o-tawaaf apna

kaabe mein bhi kisi ki mahmil ko dhoondate hain