ungaliyan kaanon mein rakh kar ai musafir sun zara

aa rahi hai saaf aawaaz-e-dara achchhi tarah

chashm-e-moosa la saki ik us ke jalwe ki na taab

chashm-e-dil se jis ko dekha baar-ha achchhi tarah

faasla aisa nahi kuchh arsh ki zanjeer se

kya kahoon badhta nahi dast-e-dua achchhi tarah

ahal-e-soorat ko nahi hai achchhi seerat se gharaz

achchhi soorat chahiye achchhi ada achchhi tarah

shaahidaan-e-laala-o-gul ki khabar laai hai kuchh

saal bhar ke baad aai ai saba achchhi tarah

seekh legi bal ki lena ta-kamar aane toh do

bal abhi karti nahi zulf-e-dota achchhi tarah

sheesha-o-jaam-o-suboo bhar le mai-e-gul-rang se

aaj saaqui ghir ke aai hai ghata achchhi tarah

lete hain ahal-e-junoon kya kya tasawwur ke maze

aankh se pariyon ko dekha baar-ha achchhi tarah

de rahi hai us ki khaamoshi sada-e-door-baash

ye nahi kahta ki nazm-e-mubtala achchhi tarah