hamesha kooch o maquam apna raha hai khizr-e-rah-e-tareeqat

ruka toh main sang-e-meel ban kar chala toh aawaaz-e-chang ho kar

na todte aarsi agar tum toh itne yoosuf nazar na aate

ye quafila kheench laai saara shikast-e-aaeena zang ho kar

shabaab o peeri ka aana jaana ghazab ka pur-dard hai fasaana

ye rah gai ban ke gard-e-hasrat wo ud gaya rukh se rang ho kar

jo raaz dil se zaban tak aaya toh us ko quaboo mein phir na paaya

zaban se nikla kalaam ban kar kaman se chhoota khadang ho kar

ghazab hai bahar-e-fanaa ka dhaara ki mujh ko uljha ke maara maara

nafas ne maujon ka jaal bun kar lahad ne kaam-e-nahang ho kar

mila dil-e-naa-hifaaz mujh ko toh kya kisi ka lihaaz mujh ko

kahin gareban na phaad daalein janaab-e-naaseh bhi tang ho kar

jo ab ki meena-e-mai ko toda chalegi talwaar mohatsib se

lahoo bhi rindon ka dekh lena baha mai-e-laala-rang ho kar

na zabt se shikwa lab tak aaya na sabr ne aah kheenchane di

raha dahan mein wo qufl ban kar giraaya chhaati pe sang ho kar

samajh le soofi agar ye nukta hai ek bazm-e-sama-e-hasti

toh nau-piyaale ye aasman ke bajein abhi jal-tarang ho kar

bhala ho afsurda-khaatiri ka ki hasarton ko daba ke rakkha

bacha liya harazgi se us ne lihaaz-e-naamoos-o-nang ho kar

jigar-kharaashi se paai fursat na seena-kaawi se naakhunon ne

gala gareban ne ghoont daala junoon ki shorish se tang ho kar

badal ke duniyaa ne bhes sadha ise daraaya use lubhaaya

kabhi zan-e-peer-zaal ban kar kabhi but-e-shokh-o-shang ho kar

uthe the talwaar kheench kar tum toh phir taammul na chahiye tha

ki rah gai mere dil ki hasrat shaheed-e-tegh-e-darang ho kar

jo walawle the wo dab gae sab hujoom-e-lait-o-laal mein haidar

jo hausle the wo dil hi dil mein rahe daregh-o-darang ho kar