ye aah-e-be-asar kya ho ye nakhl-e-be-samar kya ho

na ho jab dard hi yaa-rab toh dil kya ho jigar kya ho

jahan insaan kho jaata ho khud phir us ki mahfil mein

rasaai kis tarah ho dakhl kyoonkar ho guzar kya ho

na poochhoonga main ye bhi jaam mein hai zahar yaa amrit

tumhare haath se andesha-e-naf-o-zarar kya ho

murawwat se ho begaana wafa se door ho koson

ye sach hai naaznin ho khoobsurat ho magar kya ho

shagoofe dekh kar mutthi mein zar ko muskuraate hain

ki jab umr is quadar kotaah rakhte hain toh zar kya ho

raha karti hai ye hairat mujhe zuhad-e-riyaai par

khuda se jo nahi darta use bande ka dar kya ho

kaha main ne ki nazm-e-mubtala marta hai hasrat mein

kaha us ne agar mar jaae toh mera zarar kya ho

kaha main ne ki hai soz-e-jigar aur uf nahi karta

kaha is ki ijaazat hi nahi phir nauhaagar kya ho

kaha main ne ki de us ko ijaazat aah karne ki

kaha us ne bhadak uththe agar soz-e-jigar kya ho

kaha main ne ki aansoo aankh ka lekin nahi thamta

kaha aankhein koi talwon se mal daale agar kya ho

kaha main ne quadam bhar par hai wo soorat dikha aao

kaha munh pher kar itna kisi ko dard-e-sar kya ho

kaha main ne asar mutlaque nahi kya sang-dil hai tu

kaha jab dil ho patthar ka toh patthar par asar kya ho

kaha main ne jo mar jaae toh kya ho soch tu dil mein

kaha naa-aaquibat-andesh ne kuchh soch kar kya ho

kaha main ne khabar bhi hai ki di jan us ne ghut ghat kar

kaha mar jaae chupke se toh phir mujh ko khabar kya ho