wo dhal raha hai toh ye bhi rangat badal rahi hai
zameen sooraj ki ungaliyon se phisal rahi hai
jo mujh ko zinda jala rahe hain wo be-khabar hain
ki meri zanjeer dheere dheere pighal rahi hai
main quatl toh ho gaya tumhaari gali mein lekin
mire lahoo se tumhaari deewar gal rahi hai
na jalne paate the jis ke choolhe bhi har sawere
suna hai kal se wo basti bhi jal rahi hai
main jaanta hoon ki khaamushi mein hi maslahat hai
magar yahi maslahat mire ko khal rahi hai
kabhi toh insaan zindagi ki karega izzat
ye ek ummeed aaj bhi dil mein pal rahi hai
Responses
No comments yet. Be the first to respond.