ham bhi kabhi aabaad the aise kahan barbaad the be-fikr the aazaad the masroor the dil-shaad the

wo chaal aisi chal gaya ham bujh gae dil jal gaya nikle jala ke apna ghar main aur miri aawaargi

jeena bahut aasaan tha ik shakhs ka ehsaan tha ham ko bhi ik armaan tha jo khawaab ka saamaan tha

ab khawaab hai nay aarzoo armaan hai nay justujoo yoon bhi chalo khush hain magar main aur miri aawaargi

wo maah-wash wo maah-roo wo maah-kaam-e-hoo-b-hoo thin jis ki baatein koo-b-koo us se ajab thi guftugoo

phir yoon hua wo kho gai toh mujh ko zid si ho gai laaenge us ko dhoond kar main aur miri aawaargi

ye dil hi tha jo sah gaya wo baat aisi kah gaya kahne ko phir kya rah gaya ashkon ka dariya bah gaya

jab kah ke wo dilbar gaya tere liye main mar gaya rote hain us ko raat bhar main aur miri aawaargi

ab gham uthaaein kis liye aansoo bahaaein kis liye ye dil jalaaein kis liye yoon jan ganwaaein kis liye

pesha na ho jis ka sitam dhoondenge ab aisa sanam honge kahin toh kaargar main aur miri aawaargi

aasaar hain sab khot ke imkaan hain sab chot ke ghar band hain sab got ke ab khatm hain sab totke

quismat ka sab ye pher hai andher hai andher hai aise hue hain be-asar main aur miri aawaargi

jab hamdam-o-hamraaz tha tab aur hi andaaz tha ab soz hai tab saaz tha ab sharm hai tab naaz tha

ab mujh se ho toh ho bhi kya hai saath wo toh wo bhi kya ik be-hunar ik be-samar main aur miri aawaargi