ilaaj-e-chaak-e-pairaahan hua toh is tarah hoga

siya jaaega kaanton se gareban ham na kahte the

taraane kuchh diye lafzon mein khud ko quaid kar lenge

ajab andaaz se phailega zindan ham na kahte the

koi itna na hoga laash bhi le ja ke dafna de

inhin sadkon pe mar jaaega insan ham na kahte the

nazar lipti hai sholon mein lahoo tapta hai aankhon mein

utha hi chaahta hai koi toofan ham na kahte the

chhalakte jaam mein bheegi hui aankhein utar aain

sataaegi kisi din yaad-e-yaaran ham na kahte the

nai tahzeeb kaise lakhnaoo ko raas aaegi

ujad jaaega ye shahar-e-ghazaalan ham na kahte the