chup hai har zakhm-e-guloo chup hai shaheedon ka lahoo

dast-e-quatil hai jo mehnat ka sila maange hai

tu bhi ik daulat-e-naayaab hai par kya kahiye

zindagi aur bhi kuchh tere siwa maange hai

khoi khoi ye nigaahein ye khameeda palkein

haath uthaae koi jis tarah dua maange hai

raas ab aaegi ashkon ki na aahon ki faza

aaj ka pyar nai aab-o-hawa maange hai

baansuri ka koi naghma na sahi cheekh sahi

har sukoot-e-shab-e-gham koi sada maange hai

laakh munkir sahi par zauque-e-parastish mera

aaj bhi koi sanam koi khuda maange hai

saans waise hi zamaane ki ruki jaati hai

wo badan aur bhi kuchh tang quaba maange hai

dil har ik haal se begaana hua jaata hai

ab tawajjoh na taghaaful na ada maange hai