pasand-e-khaatir-e-ahal-e-wafa hai muddat se

ye dil ka daagh jo khud bhi bhala lage hai mujhe

jo aansuon mein kabhi raat bheeg jaati hai

bahut quareeb wo aawaaz-e-pa lage hai mujhe

main so bhi jaaoon toh kya meri band aankhon mein

tamaam raat koi jhaankata lage hai mujhe

main jab bhi us ke khayaalon mein kho sa jaata hoon

wo khud bhi baat kare toh bura lage hai mujhe

main sochta tha ki lautoonga ajanbi ki tarah

ye mera gaanw toh pahchaanta lage hai mujhe

na jaane waqt ki raftaar kya dikhaati hai

kabhi kabhi toh bada khauf sa lage hai mujhe

bikhar gaya hai kuchh is tarah aadmi ka wajood

har ek fard koi saaneha lage hai mujhe

ab ek aadh quadam ka hisaab kya rakhiye

abhi talak toh wahi faasla lage hai mujhe

hikaayat-e-gham-e-dil kuchh kashish toh rakhti hai

zamaana ghaur se sunta hua lage hai mujhe