mire khalwat-kade ke raat din yoonhi nahi sanware

kisi ne dhoop bakhshi hai kisi ne chaandani di hai

nazar ko sabz maidaanon ne kya kya wusaatein bakhshin

pighalte aabshaaron ne hamein dariya-dili di hai

mohabbat naa-rawa taqseem ki quael nahi phir bhi

miri aankhon ko aansoo tere honton ko hansi di hai

miri aawaargi bhi ik karishma hai zamaane mein

har ik darwesh ne mujh ko dua-e-khair hi di hai

kahan mumkin tha koi kaam ham jaise diwaanon se

tumhin ne geet likhwaae tumhin ne shaairi di hai