kal phir chaand ka khanjar ghomp ke seene mein

raat ne meri jan lene ki koshish ki

koi na koi rahbar rasta kaat gaya

jab bhi apni rah chalne ki koshish ki

kitni lambi khaamoshi se guzra hoon

un se kitna kuchh kahne ki koshish ki

ek hi khawaab ne saari raat jagaaya hai

main ne har karwat sone ki koshish ki

ek sitaara jaldi jaldi doob gaya

main ne jab taare ginne ki koshish ki

naam mira tha aur pata apne ghar ka

us ne mujh ko khat likhne ki koshish ki

ek dhuein ka marghola sa nikla hai

mitti mein jab dil bone ki koshish ki