khauf ka koi nishan zaahir nahi afaaal mein

go ki dil mein muttasil khauf-e-khuda paate hain ham

karte hain taaat toh kuchh khwaahan numaaish ke nahi

par gunah chhup chhup ke karne mein mazaa paate hain ham

deeda o dil ko khayaanat se nahi rakh sakte baaz

garche dast-o-pa ko aksar be-khata paate hain ham

dil mein dard-e-ishq ne muddat se kar rakkha hai ghar

par use aalooda-e-hirs-o-hawa paate hain ham

ho ke naadim jurm se phir jurm karte hain wahi

jurm se go aap ko naadim sada paate hain ham

hain fida un doston par jin mein ho sidque o safa

par bahut kam aap mein sidque o safa paate hain ham

go kisi ko aap se hone nahi dete khafa

ik jahan se aap ko lekin khafa paate hain ham

jaante apne siwa sab ko hain be-mehar o wafa

apne mein gar shamma-e-mehar-o-wafa paate hain ham

bukhl se mansoob karte hain zamaane ko sada

gar kabhi taufeeque-e-isaar o ata paate hain ham

ho agar maqsad mein naakaami toh kar sakte hain sabr

dard-e-khud-kaami ko lekin be-dawa paate hain ham

thaharte jaate hain jitne chashm-e-aalam mein bhale

haal nafs-e-doon ka utna hi bura paate hain ham

jis quadar jhuk jhuk ke milte hain buzurg o khurd se

kibr o naaz utna hi apne mein siwa paate hain ham

go bhalaai karke ham-jinson se khush hota hai ji

tah-nashin us mein magar durd-e-riya paate hain ham

hai rida-e-nek-naami dosh par apne magar

daagh ruswaai ke kuchh zer-e-rida paate hain ham

raah ke taalib hain par be-raah padte hain quadam

dekhiye kya dhoondhate hain aur kya paate hain ham

noor ke ham ne gale dekhe hain ai haali magar

rang kuchh teri alaapon mein naya paate hain ham