ishq bhi taak mein baitha hai nazar-baazon ki

dekhna sher se aankhein na ladaana hargiz

haath malne na hon peeri mein agar hasrat se

toh jawaani mein na ye rog basaana hargiz

jitne raste the tire ho gae weeran ai ishq

aa ke weeraanon mein ab ghar na basaana hargiz

kooch sab kar gae dilli se tire quadr-shanaas

quadr yan rah ke ab apni na ganwaana hargiz

tazkira dehli-e-marhoom ka ai dost na chhed

na suna jaaega ham se ye fasaana hargiz

dhoondata hai dil-e-shoreeda bahaane mutrib

dard-angez ghazal koi na gaana hargiz

sohabtein agli musawwir hamein yaad aaengi

koi dilchasp muraqqua na dikhaana hargiz

le ke daagh aaega seene pe bahut ai sayyaah

dekh is shahar ke khandaron mein na jaana hargiz

chappe chappe pe hain yan gauhar-e-yakta tah-e-khaak

dafn hoga kahin itna na khazaana hargiz

mit gae tere mitaane ke nishan bhi ab toh

ai falak is se ziyaada na mitaana hargiz

wo toh bhoole the hamein ham bhi unhein bhool gae

aisa badla hai na badlega zamaana hargiz

ham ko gar tu ne rulaaya toh rulaaya ai charkh

ham pe ghairon ko toh zaalim na hansaana hargiz

aakhiri daur mein bhi tujh ko quasam hai saaqui

bhar ke ik jaam na pyaason ko pilaana hargiz

bakht soe hain bahut jaag ke ai daur-e-zaman

na abhi neend ke maaton ko jagaana hargiz

kabhi ai ilm o hunar ghar tha tumhaara dilli

ham ko bhoole ho toh ghar bhool na jaana hargiz

shaairi mar chuki ab zinda na hogi yaaro

yaad kar kar ke use ji na kudhaana hargiz

ghaalib o shefta o nayyar o aazurda o zauque

ab dikhaaega ye shaklein na zamaana hargiz

momin o alwi o sahbaai o mamnoon ke baad

sher ka naam na lega koi daana hargiz

kar diya mar ke yagaanon ne yagaana ham ko

warna yan koi na tha ham mein yagaana hargiz

daagh o majrooh ko sun lo ki phir is gulshan mein

na sunega koi bulbul ka taraana hargiz

raat aakhir hui aur bazm hui zer-o-zabar

ab na dekhoge kabhi lutf-e-shabaana hargiz

bazm-e-maatam toh nahi bazm-e-sukhan hai haali

yan munaasib nahi ro ro ke rulaana hargiz