tab-e-insan ko di sirisht-e-wafa

khaak ko keemiya kiya tu ne

wasl-e-jaanan muhaal thahraaya

quatl-e-aashique rawa kiya tu ne

tha na juz gham bisaat-e-aashique mein

gham ko raahat-faza kiya tu ne

jaan thi ik wabaal furqat mein

shauque ko jan-guza kiya tu ne

thi mohabbat mein nang minnat-e-ghair

jazb-e-dil ko rasa kiya tu ne

raah zaahid ko jab kahin na mili

dar-e-mai-khana wa kiya tu ne

quata hone hi jab laga paiwand

ghair ko aashna kiya tu ne

thi jahan kaarwan ko deni raah

ishq ko rahnuma kiya tu ne

naaw bhar kar jahan duboni thi

aql ko naakhuda kiya tu ne

badh gai jab pidar ko mehar-e-pisar

us ko us se juda kiya tu ne

jab hua mulk o maal rahzan-e-hosh

baadshah ko gada kiya tu ne

jab mili kaam-e-jan ko lazzat-e-dard

dard ko be-dawa kiya tu ne

jab diya raah-rau ko zauque-e-talab

sai ko naa-rasa kiya tu ne

parda-e-chashm the hijaab bahut

husn ko khud-numa kiya tu ne

ishq ko taab-e-intizaar na thi

ghurfa ik dil mein wa kiya tu ne

haram aabaad aur dair kharaab

jo kiya sab baja kiya tu ne

sakht afsurda taba thi ahbaab

ham ko jaadoo nawa kiya tu ne

phir jo dekha toh kuchh na tha yaa rab

kaun poochhe ki kya kiya tu ne

haali uttha hila ke mahfil ko

aakhir apna kaha kiya tu ne