jugnoo

jugnoo ki raushani hai kaashaanah chaman mein

yaa shama jal rahi hai phoolon ki anjuman mein

aaya hai aasman se ud kar koi sitaara

yaa jaan pad gai hai mahtaab ki kiran mein

yaa shab ki saltanat mein din ka safeer aaya

ghurbat mein aa ke chamka gumnaam tha watan mein

takma koi gira hai mahtaab ki quaba ka

zarra hai yaa numaayan sooraj ke pairhan mein

husn quadeem ki ye posheeda ik jhalak thi

le aai jis ko qudrat khalwat se anjuman mein

chhote se chaand mein hai zulmat bhi raushani bhi

nikla kabhi gahan se aaya kabhi gahan mein

parwaana ik patanga jugnoo bhi ik patanga

wo raushani ka taalib ye raushani saraapa

har cheez ko jahan mein qudrat ne dilabri di

parwaane ko tapish di jugnoo ko raushani di

rangin nawa banaaya murghaan be zaban ko

gul ko zabaan de kar taaleem khaamushi di

nazaariya shafaque ki khoobi zawaal mein thi

chamka ke us pari ko thodi si zindagi di

rangin kya sahar ko baanki dalan ki soorat

pahna ke laal joda shabnam ki aarsi di

saaya diya shajar ko parwaaz di hua ko

paani ko di rawaani maujon ko be kali di

ye imtiyaaz lekin ik baat hai hamaari

jugnoo ka din wahi hai jo raat hai hamaari

husn azal ki paida har cheez mein jhalak hai

insan mein wo sukhan hai ghunche mein wo chatak hai

ye chaand aasman ka shaair ka dil hai goya

wan chaandani hai jo kuchh yan dard ki kasak hai

andaaz guftugoo ne dhoke diye hain warna

naghma hai boo bulbul boo phool ki chahak hai

kasrat mein ho gaya hai wahdat ka raaz makhfi

jugnoo mein jo chamak hai wo phool mein mahak hai

ye ikhtilaaf phir kyoon hangaamon ka mahal ho

har shay mein jabka pinhan khaamoshi azal ho