usoolon par jahan aanch aae takraana zaroori hai

jo zinda ho toh phir zinda nazar aana zaroori hai

nai umron ki khud-mukhtaariyon ko kaun samjhaae

kahan se bach ke chalna hai kahan jaana zaroori hai

thake-haare parinde jab basere ke liye lautein

saleequa-mand shaakhon ka lachak jaana zaroori hai

bahut bebaak aankhon mein taalluque tik nahi paata

mohabbat mein kashish rakhne ko sharmaana zaroori hai

saleequa hi nahi shaayad use mahsoos karne ka

jo kahta hai khuda hai toh nazar aana zaroori hai

mire honton pe apni pyaas rakh do aur phir socho

ki is ke baad bhi duniyaa mein kuchh paana zaroori hai