jo mujh mein tujh mein chala aa raha hai sadiyon se

kahin hayaat usi faasle ka naam na ho

koi charaagh na aansoo na aarzoo-e-sahar

khuda kare ki kisi ghar mein aisi shaam na ho

ajeeb shart lagaai hai ehtiyaaton ne

ki tera zikr karoon aur tera naam na ho

saba-mizaaj ki tezi bhi ek nemat hai

agar charaagh bujhaana hi ek kaam na ho

waseem kitni hi subhein lahoo lahoo guzrin

ik aisi subh bhi aae ki jis ki shaam na ho