chalo ham hi pahal kar dein ki ham se bad-guman kyoon ho
koi rishta zara si zid ki khaatir raaegan kyoon ho
main zinda hoon toh is zinda-zameeri ki badaulat hi
jo bole tere lahje mein bhala meri zaban kyoon ho
sawaal aakhir ye ik din dekhna ham hi uthaaenge
na samjhe jo zamin ke wo apna aasman kyoon ho
hamaari guftugoo ki aur bhi samtein bahut si hain
kisi ka dukhaane hi ko phir apni zaban kyoon ho
bikhar kar rah gaya hamsaaygi ka khawaab hi warna
diye is ghar mein raushan hon toh us ghar mein dhuan kyoon ho
mohabbat aasman ko jab zamin karne ki zid thahri
toh phir buzdil usoolon ki sharaafat darmiyan kyoon ho
ummeedein saari duniyaa se waseem aur khud mein aise gham
kisi pe kuchh na zaahir ho toh koi meharban kyoon ho
Responses
No comments yet. Be the first to respond.