naaz deta nahi gar rukhsat-e-gul-gasht-e-chaman

ai chaman-zaar-e-haya dil ke gulistaan mein aa

aish hai aish ki us mah ka khayaal-e-raushan

shama raushan kiya mujh dil ke shabistan mein aa

yaad aata hai mujhe wo do gul-e-baagh-e-wafa

ashk karte hain makan gosha-e-daamaan mein aa

mauj-e-be-taabi-e-dil ashk mein hui jalwa-numa

jab basi zulf-e-sanam tab-e-pareshaan mein aa

naala-o-aah ki tafseel na poochho mujh soon

daftar-e-dard basa ishq ke deewaan mein aa

panja-e-ishq ne betaab kiya jab soon mujhe

chaak-e-dil tab soon basa chaak-e-garebaan mein aa

dekh ai ahal-e-nazar sabza-e-khat mein lab-e-laal

rang-e-yaaquoot chhupa hai khat-e-raihaan mein aa

husn tha parda-e-tajreed mein sab soon aazaad

taalib-e-ishq hua soorat-e-insaan mein aa

shaikh yahan baat tiri pesh na jaawe hargiz

aql koon chhod ke mat majlis-e-rindaan mein aa

dard-mandan ko b-juz dard nahi said muraad

ai shah-e-mulk-e-junoon gham ke bayaabaan mein aa

haakim-e-waqt hai tujh ghar mein raqueeb-e-bad-khoo

dew mukhtaar hua mulk-e-sulaimaan mein aa

chashma-e-aab-e-baqua jag mein kiya hai haasil

yoosuf-e-husn tire chaah-e-zanakhdaan mein aa

jag ke khooban ka namak ho ke namak-parwarda

chhup raha aa ke tire lab ke namak-daan mein aa

bas ki mujh haal soon ham-sar hai pareshaani mein

dard kahti hai mira zulf tire kaan mein aa

gham soon tere hai tarahhum ka mahal haal-e-wali

zulm ko chhod sajan shewa-e-ehsaan mein aa