hue hain raam peetam ke nayan aahista-aahista
ki jyoon phaande mein aate hain hiran aahista-aahista
mira misl parwaane ke tha mushtaaque jalne ka
lagi us shama soon aakhir lagan aahista-aahista
gireban ka mat chaak kar ai khaatir-e-miskin
sunega baat wo sheerin-bachan aahista-aahista
gul o bulbul ka gulshan mein khalal howe toh barja hai
chaman mein jab chale wo gul-badan aahista-aahista
wali seene mein mere panja-e-ishq-e-sitamgar ne
kiya hai chaak dil ka pairhan aahista-aahista
Responses
No comments yet. Be the first to respond.
kya kahoon kuchh kaha nahin jaata
ab to bin tere raha nahin jaata
yaad karna har ghadi us yaar ka
hai wazifa mujh dil-e-bimaar ka
raah-e-mazmoon-e-taaza band nahin
taa qayaamat khula hai baab-e-sukhan
jise ishq ka teer kaari lage
use zindagi kyun na bhaari lage
muflisi sab bahaar khoti hai
mard ka aitbaar khoti hai
dekhna har subah tujh rukhsaar ka
hai mutaala mujh dil-e-bimaar ka