thahar thahar ke jala dil ko ek baar na phoonk

ki is mein boo-e-mohabbat abhi nikalti hai

bajaae shikwa bhi deta hoon main dua us ko

miri zaban se karoon kya yahi nikalti hai

khushi mein ham ne ye shokhi kabhi nahi dekhi

dam-e-itaab jo rangat tiri nikalti hai

hazaar baar jo maanga karo toh kya haasil

dua wahi hai jo dil se kabhi nikalti hai

ada se teri magar khinch rahin hain talwaarein

nigah nigah se chhuri par chhuri nikalti hai

muheet-e-ishq mein hai kya umeed o beem mujhe

ki doob doob ke kashti miri nikalti hai

jhalak rahi hai sar-e-shaakh-e-miza khoon ki boond

shajar mein pahle samar se kali nikalti hai

shab-e-firaaque jo khole hain ham ne zakhm-e-jigar

ye intizaar hai kab chaandani nikalti hai

samajh toh leejiye kahne toh deejiye matlab

bayan se pahle hi mujh par chhuri nikalti hai

ye dil ki aag hai yaa dil ke noor ka hai zuhoor

nafas nafas mein mire raushani nikalti hai

kaha jo main ne ki mar jaaoonga toh kahte hain

hamare zaaiche mein zindagi nikalti hai

samajhne waale samajhte hain pech ki taqureer

ki kuchh na kuchh tiri baaton mein fi nikalti hai

dam-e-akheer tasawwur hai kis pari-wash ka

ki meri rooh bhi ban kar pari nikalti hai

sanam-kade mein bhi hai husn ik khudaai ka

ki jo nikalti hai soorat pari nikalti hai

mire nikaale na niklegi aarzoo meri

jo tum nikaalna chaaho abhi nikalti hai

gham-e-firaaque mein ho daagh is quadar betaab

zara se ranj mein jan aap ki nikalti hai