wo chhalaawa is aan se nikla

al-aman har zabaan se nikla

khaar-e-hasrat bayaan se nikla

dil ka kaanta zabaan se nikla

fitna-gar kya makaan se nikla

aasman aasmaan se nikla

aa gaya ghash nigaah dekhte hi

muddaa kab zabaan se nikla

kha gae the wafa ka dhoka ham

jhoot sach imtihaan se nikla

dil mein rahne na doon tira shikwa

dil mein aaya zabaan se nikla

waham aate hain dekhiye kya ho

wo akela makaan se nikla

tum baraste rahe sar-e-mahfil

kuchh bhi meri zabaan se nikla

sach toh ye hai moaamla dil ka

baahar apne gumaan se nikla

us ko aayat hadees kya samjhein

jo tumhaari zabaan se nikla

pad gaya jo zaban se teri harf

phir na apne makaan se nikla

dekh kar roo-e-yaar salle-ala

be-tahaasha zabaan se nikla

lo quayaamat ab aai wo kaafir

ban-bana kar makaan se nikla

mar gae ham magar tira armaan

dil se nikla na jaan se nikla

rahraw-e-raah-e-ishq the laakhon

aage main kaarwaan se nikla

samjho patthar ki tum lakeer use

jo hamaari zabaan se nikla

bazm se tum ko le ke jaaenge

kaam kab phool-paan se nikla

kya murawwat hai naawak-e-dil-doz

pahle hargiz na jaan se nikla

tere deewaanon ka bhi lashkar aaj

kis tajammul se shaan se nikla

mud ke dekha toh main ne kab dekha

door jab paasbaan se nikla

wo hile lab tumhare waade par

wo tumhaari zabaan se nikla

us ki baanki ada ne jab maara

dam mira aan taan se nikla

mere aansoo ki us ne ki taareef

khoob moti ye kaan se nikla

ham khade tum se baatein karte the

ghair kyoon darmiyaan se nikla

zikr ahal-e-wafa ka jab aaya

daagh un ki zabaan se nikla