na jaao haal-e-dil-e-zaar dekhte jaao

ki ji na chaahe toh naachaar dekhte jaao

bahaar-e-umr mein baagh-e-jahan ki sair karo

khila hua hai ye gulzaar dekhte jaao

yahi toh chashm-e-haqueeqat nigar ka surma hai

niza-e-kaafir-o-din-daar dekhte jaao

uthaao aankh na sharmaao ye toh mahfil hai

ghazab se jaanib-e-aghyaar dekhte jaao

nahi hai jins-e-wafa ki tumhein jo quadr na ho

banenge kitne khareedaar dekhte jaao

tumhein gharaz jo karo raham paaemaalon par

tum apni shokhi-e-raftaar dekhte jaao

quasam bhi khaai thi quraaan bhi uthaaya tha

phir aaj hai wahi inkaar dekhte jaao

ye shaamat aai ki us ki gali mein dil ne kaha

khula hai rauzan-e-deewar dekhte jaao

hua hai kya abhi hangaama aur kuchh hoga

fughan mein hashr ke aasaar dekhte jaao

shab-e-wisaal adoo ki yahi nishaani hai

nishan-e-bosa-e-rukhsaar dekhte jaao

tumhaari aankh mire dil se le sabab be-wajh

hui hai ladne ko tayyaar dekhte jaao

idhar ko aa hi gae ab toh hazrat-e-zaahid

yahin hai khana-e-khu़mmaar dekhte jaao

raqueeb barsar-e-parkhaash ham se hota hai

badhegi muft mein takraar dekhte jaao

nahi hain jurm-e-mohabbat mein sab ke sab mulzim

khata muaaf khata-waar dekhte jaao

dikha rahi hai tamaasha falak ki nairangi

naya hai shobda har baar dekhte jaao

bana diya miri chaahat ne ghairat-e-yoosuf

tum apni garmi-e-bazaar dekhte jaao

na jaao band kiye aankh rah-rawaan-e-adam

idhar udhar bhi khabar-daar dekhte jaao

suni-sunaai pe hargiz kabhi amal na karo

hamare haal ke akhbaar dekhte jaao

koi na koi har ik sher mein hai baat zaroor

janaab-e-daagh ke ashaaar dekhte jaao