ham nikamme hue zamaane ke

kaam aisa sikha diya tu ne

kuchh taalluque raha na duniyaa se

shaghl aisa bata diya tu ne

kis khushi ki khabar suna ke mujhe

gham ka putla bana diya tu ne

kya bataaoon ki kya liya main ne

kya kahoon main ki kya diya tu ne

be-talab jo mila mila mujh ko

be-gharaz jo diya diya tu ne

umr-e-jaawed khizr ko bakhshi

aab-e-haiwan pila diya tu ne

naar-e-namrood ko kiya gulzaar

dost ko yoon bacha diya tu ne

dast-e-moosa mein faiz bakhshish hai

noor-o-lauh-o-asa diya tu ne

subh mauj naseem gulshan ko

nafas-e-jan-faza diya tu ne

shab-e-teera mein shama raushan ko

noor khursheed ka diya tu ne

naghma bulbul ko rang-o-boo gul ko

dil-kash-o-khushnuma diya tu ne

kahin mushtaaque se hijaab hua

kahin parda utha diya tu ne

tha mira munh na quabil-e-labbaik

kaaba mujh ko dikha diya tu ne

jis quadar main ne tujh se khwaahish ki

is se mujh ko siwa diya tu ne

rahbar-e-khizr-o-haadi-e-ilyaas

mujh ko wo rahnuma diya tu ne

mit gae dil se naqsh-e-baatil sab

naqsha apna jama diya tu ne

hai yahi raah manzil-e-maqsood

khoob raste laga diya tu ne

mujh gunahgaar ko jo bakhsh diya

toh jahannum ko kya diya tu ne

daagh ko kaun dene waala tha

jo diya ai khuda diya tu ne