tewar tire ai rashk-e-quamar dekh rahe hain

ham shaam se aasaar-e-sahar dekh rahe hain

mera dil-e-gum-gashta jo dhoonda nahi milta

wo apna dahan apni kamar dekh rahe hain

koi toh nikal aaega sarbaaz-e-mohabbat

dil dekh rahe hain wo jigar dekh rahe hain

hai majma-e-aghyaar ki hangaama-e-mahshar

kya sair mire deeda-e-tar dekh rahe hain

ab ai nigah-e-shauque na rah jaae tamannaa

is waqt udhar se wo idhar dekh rahe hain

har-chand ki har roz ki ranjish hai quayaamat

ham koi din us ko bhi magar dekh rahe hain

aamad hai kisi ki ki gaya koi idhar se

kyoon sab taraf-e-raahguzar dekh rahe hain

takraar tajalli ne tire jalwe mein kyoon ki

hairat-zada sab ahal-e-nazar dekh rahe hain

nairang hai ek ek tira deed ke quabil

ham ai falak-e-shobda-gar dekh rahe hain

kab tak hai tumhaara sukhan-e-talkh gawaara

is zahar mein kitna hai asar dekh rahe hain

kuchh dekh rahe hain dil-e-bismil ka tadapna

kuchh ghaur se quatil ka hunar dekh rahe hain

ab tak toh jo quismat ne dikhaaya wahi dekha

aainda ho kya nafa o zarar dekh rahe hain

pahle toh suna karte the aashique ki museebat

ab aankh se wo aath pahar dekh rahe hain

kyoon kufr hai deedaar-e-sanam hazrat-e-waaiz

allaah dikhaata hai bashar dekh rahe hain

khat ghair ka padhte the jo toka toh wo bole

akhbaar ka parcha hai khabar dekh rahe hain

padh padh ke wo dam karte hain kuchh haath par apne

hans hans ke mire zakhm-e-jigar dekh rahe hain

main daagh hoon marta hoon idhar dekhiye mujh ko

munh pher ke ye aap kidhar dekh rahe hain