kahin hai id ki shaadi kahin maatam hai maqtal mein

koi quatil se milta hai koi bismil se milta hai

pas-e-parda bhi laila haath rakh leti hai aankhon par

ghubaar-e-naa-tawaan-e-quais jab mahmil se milta hai

bhare hain tujh mein wo laakhon hunar ai majma-e-khoobi

mulaaquati tira goya bhari mahfil se milta hai

mujhe aata hai kya kya rashk waqt-e-zabh us se bhi

gala jis dam lipat kar khanjar-e-quatil se milta hai

b-zaahir ba-adab yoon hazrat-e-naaseh se milta hoon

mureed-e-khaas jaise murshid-e-kaamil se milta hai

misaal-e-ganj-e-quaroon ahal-e-haajat se nahi chhupta

jo hota hai sakhi khud dhoond kar saail se milta hai

jawaab is baat ka us shokh ko kya de sake koi

jo dil le kar kahe kam-bakht tu kis dil se milta hai

chhupaae se koi chhupti hai apne dil ki betaabi

ki har taar-e-nafas apna rag-e-bismil se milta hai

adam ki jo haqueeqat hai wo poochho ahal-e-hasti se

musafir ko toh manzil ka pata manzil se milta hai

ghazab hai daagh ke dil se tumhaara dil nahi milta

tumhaara chaand sa chehra mah-e-kaamil se milta hai