mere quaboo mein na pahron dil-e-naashaad aaya

wo mira bhoolne waala jo mujhe yaad aaya

koi bhoola hua andaaz-e-sitam yaad aaya

ki tabassum tujhe zaalim dam-e-bedaad aaya

laae hain log janaaze ki tarah mahshar mein

kis museebat se tira kushta-e-bedaad aaya

jazb-e-wahshat tire qurbaan tira kya kahna

khinch ke rag rag mein mire nashtar-e-fassaad aaya

us ke jalwe ko gharaz kaun-o-makan se kya tha

daad lene ke liye husn-e-khuda-daad aaya

bastiyon se yahi aawaaz chali aati hai

jo kiya tu ne wo aage tire farhaad aaya

dil-e-weeran se raqueebon ne muraadein paain

kaam kis kis ke mira khirman-e-barbaad aaya

ishq ke aate hi munh par mire phooli hai basant

ho gaya zard ye shaagird jab ustaad aaya

ho gaya farz mujhe shauque ka daftar likhna

jab mire haath koi khaama-e-faulaad aaya

id hai quatl mira ahal-e-tamaasha ke liye

sab gale milne lage jab ki wo jallaad aaya

chain karte hain wahan ranj uthaane waale

kaam uqba mein hamaara dil-e-naashaad aaya

di shab-e-wasl moazzin ne azan pichhli raat

haae kam-bakht ko kis waqt khuda yaad aaya

mere naale ne sunaai hai khari kis kis ko

munh farishton pe ye gustaakh ye aazaad aaya

gham-e-jaawed ne di mujh ko mubaarakbaadi

jab suna ye ki unhein shewa-e-bedaad aaya

main tamannaa-e-shahaadat ka mazaa bhool gaya

aaj is shauque se armaan se jallaad aaya

shaadiyaana jo diya naala o shewan ne diya

jab mulaaquat ko naashaad ki naashaad aaya

leejiye suniye ab afsaana-e-furqat mujh se

aap ne yaad dilaaya toh mujhe yaad aaya

aap ki bazm mein sab kuchh hai magar daagh nahi

ham ko wo khana-kharaab aaj bahut yaad aaya