mohabbat mein kare kya kuchh kisi se ho nahi sakta

mira marna bhi toh meri khushi se ho nahi sakta

alag karna raqueebon ka ilaahi tujh ko aasan hai

mujhe mushkil ki meri beksi se ho nahi sakta

kiya hai waada-e-farda unhon ne dekhiye kya ho

yahan sabr o tahammul aaj hi se ho nahi sakta

ye mushtaaque-e-shahaadat kis jagah jaaein kise dhoondein

ki tera kaam quatil jab tujhi se ho nahi sakta

laga kar tegh quissa paak keejiye daad-khwaahon ka

kisi ka faisla kar munsifi se ho nahi sakta

mira dushman b-zaahir chaar din ko dost hai tera

kisi ka ho rahe ye har kisi se ho nahi sakta

pursish kahoge kya wahan jab yan ye soorat hai

ada ik harf-e-waada naazuki se ho nahi sakta

na kahiye go ki haal-e-dil magar rang-aashna hain ham

ye zaahir aap ki kya khaamushi se ho nahi sakta

kiya jo ham ne zaalim kya karega ghair munh kya hai

kare toh sabr aisa aadmi se ho nahi sakta

chaman mein naaz bulbul ne kiya jo apni naale par

chatak kar ghuncha bola kya kisi se ho nahi sakta

nahi gar tujh pe quaboo dil hai par kuchh zor ho apna

karoon kya ye bhi toh naa-taaquti se ho nahi sakta

na rona hai tareeque ka na hansana hai saleeque ka

pareshaani mein koi kaam ji se ho nahi sakta

hua hoon is quadar mahjoob arz-e-muddaa kar ke

ki ab toh uzr bhi sharmindagi se ho nahi sakta

ghazab mein jaan hai kya keeje badla ranj-e-furqat ka

badi se kar nahi sakte khushi se ho nahi sakta

mazaa jo iztiraab-e-shauque se aashique ko hai haasil

wo tasleem o raza o bandagi se ho nahi sakta

khuda jab dost hai ai daagh kya dushman se andesha

hamaara kuchh kisi ki dushmani se ho nahi sakta