kisi tarah jo na us but ne etibaar kiya

miri wafa ne mujhe khoob sharmasaar kiya

hansa hansa ke shab-e-wasl ashk-baar kiya

tasalliyan mujhe de de ke be-quaraar kiya

ye kis ne jalwa hamare sar-e-mazaar kiya

ki dil se shor utha haae be-quaraar kiya

suna hai tegh ko quatil ne aab-daar kiya

agar ye sach hai toh be-shubah ham pe waar kiya

na aae raah pe wo ijz be-shumaar kiya

shab-e-wisaal bhi main ne toh intizaar kiya

tujhe toh waada-e-deedaar ham se karna tha

ye kya kiya ki jahan ko umeed-waar kiya

ye dil ko taab kahan hai ki ho maaal-andesh

unhon ne waada kiya is ne etibaar kiya

kahan ka sabr ki dam par hai ban gai zaalim

b tang aae toh haal-e-dil aashkaar kiya

tadap phir ai dil-e-naadan ki ghair kahte hain

akheer kuchh na bani sabr ikhtiyaar kiya

mile jo yaar ki shokhi se us ki bechaini

tamaam raat dil-e-muztarib ko pyar kiya

bhula bhula ke jataaya hai un ko raaz-e-nihan

chhupa chhupa ke mohabbat ko aashkaar kiya

na us ke dil se mitaaya ki saaf ho jaata

saba ne khaak pareshan mira ghubaar kiya

ham aise mahaw-e-nazaara na the jo hosh aata

magar tumhare taghaaful ne hoshyaar kiya

hamare seene mein jo rah gai thi aatish-e-hijr

shab-e-wisaal bhi us ko na ham-kanaar kiya

raqueeb o shewa-e-ulfat khuda ki qudrat hai

wo aur ishq bhala tum ne etibaar kiya

zabaan-e-khaar se nikli sada-e-bismillaah

junoon ko jab sar-e-shoreeda par sawaar kiya

tiri nigah ke tasawwur mein ham ne ai quatil

laga laga ke gale se chhuri ko pyar kiya

ghazab thi kasrat-e-mahfil ki main ne dhoke mein

hazaar baar raqueebon ko ham-kanaar kiya

hua hai koi magar us ka chaahne waala

ki aasman ne tira shewa ikhtiyaar kiya

na poochh dil ki haqueeqat magar ye kahte hain

wo be-quaraar rahe jis ne be-quaraar kiya

jab un ko tarz-e-sitam aa gae toh hosh aaya

bura ho dil ka bure waqt hoshyaar kiya

fasaana-e-shab-e-gham un ko ik kahaani thi

kuchh etibaar kiya kuchh na etibaar kiya

aseeri dil-e-aashufta rang la ke rahi

tamaam turra-e-tarraar taar taar kiya

kuchh aa gai daawar-e-mahshar se hai ummeed mujhe

kuchh aap ne mire kahne ka etibaar kiya

kisi ke ishq-e-nihan mein ye bad-gumaani thi

ki darte darte khuda par bhi aashkaar kiya

falak se taur quayaamat ke ban na padte the

akheer ab tujhe aashob-e-rozgaar kiya

wo baat kar jo kabhi aasman se ho na sake

sitam kiya toh bada tu ne iftikhaar kiya

banega mehar-e-quayaamat bhi ek khaal-e-siyaah

jo chehra daagh-e-siyah-roo ne aashkaar kiya