jannat mein jaaein ham ki jahannam mein jaaein ham

mil jaae toh kahin na kahin tujh ko paaein ham

jauf-e-falak mein khaak bhi lazzat nahi rahi

ji chaahta hai teri jafaaein uthaaein ham

dar hai na bhool jaae wo saffaak roz-e-hashr

duniyaa mein likhte jaate hain apni khataaein ham

mumkin hai ye ki waade par apne wo aa bhi jaae

mushkil ye hai ki aap mein us waqt aaein ham

naaraaz ho khuda toh karein bandagi se khush

maashooque rooth jaae toh kyoonkar manaaein ham

sar doston ka kaat ke rakhte hain saamne

ghairon se poochhte hain quasam kis ki khaaein ham

kitna tira mizaaj khushaamad-pasand hai

kab tak karein khuda ke liye iltijaaein ham

laalach abas hai dil ka tumhein waqt-e-waapsin

ye maal wo nahi ki jise chhod jaaein ham

saumpa tumhein khuda ko chale ham toh naa-muraad

kuchh padh ke bakhshana jo kabhi yaad aaein ham

soz-e-daroon se apne sharar ban gae hain ashk

kyoon aah-e-sard ko na patinge lagaaein ham

ye jaan tum na loge agar aap jaaegi

us bewfa ki khair kahan tak manaaein ham

ham-saae jaagte rahe naalon se raat bhar

soe hue naseeb ko kyoonkar jagaaein ham

jalwa dikha raha hai wo aaeena-e-jamaal

aati hai ham ko sharm ki kya munh dikhaaein ham

maano kaha jafa na karo tum wafa ke baad

aisa na ho ki pher lein ulti duaaein ham

dushman se milte julte hain khaatir se dosti

kya faaeda jo dost ko dushman banaaein ham

tu bhoolne ki cheez nahi khoob yaad rakh

ai daagh kis tarah tujhe dil se bhulaaein ham