gile shikwe kahan tak honge aadhi raat toh guzri

pareshan tum bhi hote ho pareshan ham bhi hote hain

jo rakkhe chaaraagar kaafoor dooni aag lag jaae

kahin ye zakhm-e-dil sharminda-e-marham bhi hote hain

wo aankhein saamri-fan hain wo lab isa-nafas dekho

mujhi par sehar hote hain mujhi par dam bhi hote hain

zamaana dosti par in haseenon ki na itraae

ye aalam-dost aksar dushman-e-aalam bhi hote hain

b-zaahir rahnuma hain aur dil mein bad-gumaani hai

tire kooche mein jo jaata hai aage ham bhi hote hain

hamare aansuon ki aabdaari aur hi kuchh hai

ki yoon hone ko raushan gauhar-e-shabnam bhi hote hain

khuda ke ghar mein kya hai kaam zaahid baada-khwaaron ka

jinhein milti nahi wo tishna-e-zamzam bhi hote hain

hamare saath hi paida hua hai ishq ai naaseh

judaai kis tarah se ho juda tawaam bhi hote hain

nahi ghatti shab-e-furqat bhi aksar ham ne dekha hai

jo badh jaate hain had se wo hi ghat kar kam bhi hote hain

bachaaoon pairhan kya chaaraagar main dast-e-wahshat se

kahin aise gareban daaman-e-maryam bhi hote hain

tabeeat ki kaji hargiz mitaae se nahi mitti

kabhi seedhe tumhare gesoo-e-pur-kham bhi hote hain

jo kahta hoon ki marta hoon toh farmaate hain mar jaao

jo ghash aata hai toh mujh par hazaaron dam bhi hote hain

kisi ka waada-e-deedaar toh ai daagh bar-haque hai

magar ye dekhiye dil-shaad us din ham bhi hote hain