parde parde mein mohabbat dushman-e-jaani hui

ye khuda ki maar kya ai shauque-e-pinhaani hui

dil ka sauda kar ke un se kya pashemaani hui

quadr us ki phir kahan jis shay ki arzaani hui

mere ghar us shokh ki do din se mehmaani hui

beksi ki aaj kal kya khana-weeraani hui

tark-e-rasm-o-raah par afsos hai donon taraf

ham se naadaani hui yaa tum se naadaani hui

ibtida se intiha tak haal un se kah toh doon

fikr ye hai aur jo kah kar pashemaani hui

gham quayaamat ka nahi waaiz mujhe ye fikr hai

deen kab baaqui raha duniyaa agar faani hui

tum na shab ko aaoge ye hai yaquin aaya hua

tum na maanoge miri ye baat hai maani hui

mujh mein dam jab tak raha mushkil mein the teemaardaar

meri aasaani se sab yaaron ki aasaani hui

is ko kya kahte hain utna hi badha shauque-e-wisaal

jis quadar mashhoor un ki paak-daamaani hui

bazm se uthne ki ghairat baithne se dil ko rashk

dekh kar ghairon ka majma kya pareshaani hui

daawa-e-taskheer par ye us pari-wash ne kaha

aap ka dil kya hua mohar-e-sulemaani hui

khul gain zulfein magar us shokh mast-e-naaz ki

jhoomti baad-e-saba phirti hai mastaani hui

main saraapa sajde karta us ke dar par shauque se

sar se pa tak kyoon na peshaani hi peshaani hui

dil ki qualb-e-maahiyat ka ho use kyoonkar yaquin

kab hawa mitti hui hai aag kab paani hui

aate hi kahte ho ab ghar jaaenge achchhi kahi

ye masal poori yahan man-maani ghar jaani hui

arsa-e-mahshar mein tujh ko dhoond laaoon toh sahi

koi chhup sakti hai jo soorat ho pahchaani hui

dekh kar quatil ka khaali haath bhi ji dar gaya

us ki cheen-e-aastin bhi cheen-e-peshaani hui

kha ke dhoka us but-e-kamsin ne daaman mein liye

ashk-afshaani bhi meri gauhar-afshaani hui

beksi par meri apni tegh ki hasrat toh dekh

chashm-e-jauhar bhi b-shakl-e-chashm-e-hairaani hui

beksi par daagh ki afsos aata hai hamein

kis jagah kis waqt us ki khana-weeraani hui