dilon par saikdon sikke tire joban ke baithe hain

kalejon par hazaaron teer is chitwan ke baithe hain

ilaahi kyoon nahi uthti quayaamat maajra kya hai

hamare saamne pahloo mein wo dushman ke baithe hain

ye gustaakhi ye chhed achchhi nahi hai ai dil-e-naadan

abhi phir rooth jaaenge abhi toh man ke baithe hain

asar hai jazb-e-ulfat mein toh khinch kar aa hi jaaenge

hamein parwa nahi ham se agar wo tan ke baithe hain

subuk ho jaaenge gar jaaenge wo bazm-e-dushman mein

ki jab tak ghar mein baithe hain wo laakhon man ke baithe hain

fusoon hai yaa dua hai yaa muamma khul nahi sakta

wo kuchh padhte hue aage mire madfan ke baithe hain

bahut roya hoon main jab se ye main ne khawaab dekha hai

ki aap aansoo bahaate saamne dushman ke baithe hain

khade hon zer-e-tooba wo na dam lene ko dam bhar bhi

jo hasrat-mand tere saaya-e-daaman ke baithe hain

talaash-e-manzil-e-maqsad ki gardish uth nahi sakti

kamar khole hue raste mein ham rahzan ke baithe hain

ye josh-e-girya toh dekho ki jab furqat mein roya hoon

dar o deewar ik pal mein mire madfan ke baithe hain

nigaah-e-shokh o chashm-e-shauque mein dar-parda chhanti hai

ki wo chilman mein hain nazdeek ham chilman ke baithe hain

ye uthna baithna mahfil mein un ka rang laaega

quayaamat ban ke utthenge bhabooka ban ke baithe hain

kisi ki shaamat aaegi kisi ki jaan jaaegi

kisi ki taak mein wo baam par ban-than ke baithe hain

quasam de kar unhein ye poochh lo tum rang-dhang us ke

tumhaari bazm mein kuchh dost bhi dushman ke baithe hain

koi chheenta pade toh daagh kalkatte chale jaaein

azeemaabaad mein ham muntazir saawan ke baithe hain