mire mausmon ke bhi taur the mire barg-o-baar hi aur the

magar ab rawish hai alag koi magar ab hawa koi aur hai

yahi shahar shahar-e-quaraar hai toh dil-e-shikasta ki khair ho

miri aas hai kisi aur se mujhe poochhta koi aur hai

ye wo maajra-e-firaaque hai jo mohabbaton se na khul saka

ki mohabbaton hi ke darmiyan sabab-e-jafa koi aur hai

hain mohabbaton ki amaantein yahi hijartein yahi qurbatein

diye baam-o-dar kisi aur ne toh raha basa koi aur hai

ye faza ke rang khule khule isi pesh-o-pas ke hain silsile

abhi khush-nawa koi aur tha abhi par-kusha koi aur hai

dil-e-zood-ranj na kar gila kisi garm o sard raqueeb ka

rukh-e-naa-saza toh hai roo-b-roo pas-e-naa-saza koi aur hai

bahut aae hamdam o chaara-gar jo numood-o-naam ke ho gae

jo zawaal-e-gham ka bhi gham kare wo khush-aashna koi aur hai

ye naseer shaam-e-supurdagi ki udaas udaas si raushani

b-kanaar-e-gul zara dekhna ye tumhi ho yaa koi aur hai