marham-e-waqt na ejaaz-e-maseehaai hai
roz nae zakhm ki gahraai hai
phir mire ghar ki fazaaon mein hua sannaata
phir dar-o-baam se andesha-e-goyaai hai
tujh se bichhdoon toh koi na mahke mujh mein
dekh kya karb hai kya zaat ki sachchaai hai
tera mansha tire lahje ki dhanak mein dekha
tiri aawaaz bhi shaayad tiri angadaai hai
kuchh ajab gardish-e-parkaar safar rakhta hoon
do-quadam mujh se bhi aage miri ruswaai hai
kuchh toh ye hai ki miri raah juda hai tujh se
aur kuchh quarz bhi mujh par tiri tanhaai hai
kis liye mujh se gurezan hai mire saamne tu
kya tiri raah mein haail miri beenaai hai
wo sitaare jo chamakte hain tire aangan mein
un sitaaron se toh apni bhi shanaasaai hai
jis ko ik umr ghazal se kiya mansoob naseer
us ko parkha toh khula quafiya-paimaai hai
Responses
No comments yet. Be the first to respond.