diya sa ke kharaabe mein jal raha hai miyan
diye ke gird koi aks chal raha hai miyan
ye rooh raqs-e-charaaghan hai apne halque mein
ye jism saaya hai aur saaya dhal raha miyan
ye aankh parda hai ik gardish-e-tahayyur ka
ye nahi hai bagoola uchhal raha hai miyan
kabhi kisi ka guzarna kabhi thahar jaana
mire sukoot mein kya kya khalal raha hai miyan
kisi ki raah mein aflaak zer-e-pa hote
yahan toh paanw se sahra nikal raha hai miyan
hujoom-e-shokh mein ye dil hi be-gharaz nikla
chalo koi toh hareefaana chal raha hai miyan
tujhe abhi se padi hai ki faisla ho jaae
na jaane kab se yahan waqt tal raha hai miyan
tabeeaton hi ke milne se tha mazaa baaqui
so wo mazaa bhi kahan aaj-kal raha hai miyan
ghamon ki fasl mein jis gham ko raaegan samjhein
khushi toh ye hai ki wo gham bhi phal raha hai miyan
likha naseer ne har rang mein safed-o-siyaah
magar jo harf lahoo mein machal raha hai miyan
Responses
No comments yet. Be the first to respond.