ujad ujad ke sanwarti hai tere ki shaam
na poochh kaise guzarti hai tere ki shaam
ye barg barg udaasi bikhar rahi hai miri
ki shaakh shaakh utarti hai tere hijr ki shaam
ujaad ghar mein koi chaand kab utarta hai
sawaal mujh se ye karti hai tere hijr ki shaam
mire safar mein ik aisa bhi mod aata hai
jab apne aap se darti hai tere hijr ki shaam
bahut azeez hain dil ko ye zakhm zakhm rutein
inhi ruton mein nikharti hai tere hijr ki shaam
ye mera dil ye saraasar nigaar-khana-e-gham
sada isi mein utarti hai tere hijr ki shaam
jahan jahan bhi milein teri qurbaton ke nishan
wahan wahan se ubharti hai tere hijr ki shaam
ye haadisa tujhe shaayad udaas kar dega
ki mere saath hi marti hai tere hijr ki shaam
Responses
No comments yet. Be the first to respond.