tire badan se jo chhoo kar idhar bhi aata hai
misaal-e-rang wo jhonka bhi aata hai
tamaam jahan jalta hai ik udaas diya
hawa ki raah mein ik aisa ghar bhi aata hai
wo mujh ko toot ke chaahega chhod jaaega
mujhe khabar thi use ye hunar bhi aata hai
ujaad ban mein utarta hai ek jugnoo bhi
hawa ke saath koi ham-safar bhi aata hai
wafa ki kaun si manzil pe us ne chhoda tha
ki wo toh yaad hamein bhool kar bhi aata hai
jahan lahoo ke samundar ki had thaharti hai
wahin jazeera-e-laal-o-guhar bhi aata hai
chale jo zikr farishton ki paarsaai ka
toh zer-e-bahas maquam-e-bashar bhi aata hai
abhi sinan ko sambhaale rahein adoo mere
ki un safon mein kahin mera sar bhi aata hai
kabhi kabhi mujhe milne bulandiyon se koi
shua-e-subh ki soorat utar bhi aata hai
isi liye main kisi shab na so saka mohsin
wo maahtaab kabhi baam par bhi aata hai
Responses
No comments yet. Be the first to respond.